【Lomograpy 800 彩色菲林】一起進入雙修 DJ 波盛的《2021 香港製造》DJ set 音樂派對!

我們的一生擁有不同面向,興趣不只一種,Slash 斜桿人生因而盛行。港台 DJ 波盛(Ballshing) 近年投身打碟世界,漸漸變成了香港少見的雙修 DJ。2021 年底,他舉辦了《2021 香港製造 DJ set》音樂派對,當時更與 Wave Channel 合作,以獨特的 DJ set 風格呈現 2021 年 49 首香港歌曲,為我們帶來一場既有型又澎湃的視覺與聽覺體驗。另一邊廂,同樣喜歡音樂和菲林攝影的 LomoAmigo Goo 更以 Lomography Color Negative 800 度彩色菲林 ,記錄了這場精彩的音樂派對,迷幻朦朧的拍攝風格更添神秘氣息。

一起跟隨 Goo 的慢快門,漫遊電台和打碟 DJ 波盛的音樂世界,傾聽他一路走來的雙修心路歷程。

© Goo | Lomography Color Negative ISO 800 film

Hello 雙修 DJ 波盛!你是從何時開始接觸 DJ 音樂世界?

嗰粒種子可以數返 6 年前,因為 MOOV 贊助咗 1 年會籍, 心諗梗係唔好蝕,就喺 app 周圍搵歌聽。有次無意發現一個 Tomorrowland album (註:Tomorrowland 係國際大型電子音樂節),畀入面一首歌吸引咗,係〈This Is What It Feels Like - W&W Remix〉。嗰陣聽到個 drop, 我個反應係「嘩!原來歌可以係咁!」無乜好有意義嘅歌詞,但個音樂會震到入身嘅興奮,我無誇張,你會 feel 到有啲嘢流咗入身體裏面。就係呢個體驗令我沉迷咗不斷搵歌聽,之後又搵到另一張 album 叫〈BEST of EDM 2015〉。裏面有齊當年好 hit、呢家變成經典嘅 EDM, 例如 Martin Garrix〈Animals〉、Swedish House Mafia〈Don't You Worry Child〉等等。

當時一路搵有咩類型嘅歌自己鍾意,到最後落腳點就係 Marshmello, 佢應該係我第一個鍾意嘅 EDM artist, 試過特登飛去新加坡睇佢嘅演出。但因為啲歌好快煲晒,又想搵同類歌聽,就開始了解不同的音樂 genre, 知道原來呢種叫 future bass, 就拎住啲 keywords 去搵歌。幾年以嚟就不斷搵歌聽、睇下啲歷史、了解下啲 genre, 起碼講得出自己聽緊啲咩。加上早幾年香港都一直有搞大型電子音樂節,每年去完又更加返唔到轉頭。

咁你知人鍾意一樣嘢,又會心思思想試吓。所以 3 年前喺 ebay 買咗個二手 DJ controller 返嚟做生日禮物畀自己,訂閱咗個 record pool, 下載咗堆歌落嚟試吓。而最後,三個月左右就停咗。因為望住 YouTube 啲教學真係好悶,太高級嘅技巧做唔到,新手入門嘅個個都一定講要練好對耳嘅 beat matching。練咗一排覺得都係咁啦,又無咩好遠大嘅目標純粹當興趣,咁就荒廢咗。

© Goo | Lomography Color Negative ISO 800 film

然後來到 2020 年,嗰陣同兩位朋友 INK、鄒攝做咗第一首 Serrini 嘅 remix。有晚突然諗,究竟呢首懷舊曲風嘅 remix 可唔可以夾到真係 80 年代嘅廣東歌呢?於是將部 DJ controller 攞返出嚟玩。整咗一晚,完全搞唔掂。咁啱見到 INK 喺 IG 開緊 live 打緊碟玩佢自己 Beat Friday 啲歌,我就 message 佢話我玩唔掂,不如搵晚一齊研究。之後每星期都有一晚上佢 studio 玩,由初頭睇佢打碟,到自己嘗試落埋手一齊玩。而最學得多應該係我哋玩咗個遊戲,就係一人輪住打一首,要喺一首歌嘅時間裏面搵到另一首歌接落去。嗰堆歌係嗰期搵到嘅舊廣東歌 remix album, 叫〈Remix 101〉。因為啲 remix 版本我哋都未聽過,所以好靠感覺去做 transition。雖然當時炒粉多過成功,但都無人睇炒咗都無所謂啦,就係咁樣玩玩下又好似練咗啲嘢返嚟。

到真係好認真咁去打碟呢件事,應該係 2020 年 10 月加入〈騷動音樂〉呢個電台節目。儲咗一定嘅基本功,就好想喺節目度每星期有半個鐘嘅 DJ set。初時都好淆㗎,好驚畀人投訴。大佬黃昏 6 點幾煮煮下飯個收音機播 dubstep 喎,唔係聽開嘅聽眾未必接受到。總之個節目開波後,每星期都喺屋企錄低段 live DJ set,然後喺節目就播段 mix 再 on top 介紹啲歌。就係咁一步步成為呢家嘅 bedroom DJ。

為什麼會想以 DJ Set 去介紹 49 首 2021 年推出的香港歌曲?

好似頭先咁講,2015 年開始聽 EDM 啦,嗰陣未諗住打碟,剩係試過將啲派台歌用我平時剪訪問嘅 software 試吓可唔可以砌到 remix 出嚟。嗰陣試過將 JW 首〈矛盾一生〉cut 剩人聲,再將鄭融首〈Love Hard〉cut 走人聲剩返啲樂器,然後砌埋一齊。結果梗係唔 work!但我就同我當時節目嘅拍擋 Eric 講,如果有一日可以用啲廣東歌去整 remix、甚至成 set 都係香港嘅歌就正喇!

咁當年都係後生仔講吓過頭說話,無認真去諗過點做呢件事。直至 2021 年收到唔同派台歌後發現,好似有 potential 砌一個完整嘅廣東歌 DJ set, 於事喺節目實驗咗幾次,發覺都好似幾好 feel。可能係呢幾次實驗嘅累積下,令我 9 月時突然靈機一觸,不如年尾整個 DJ set 砌一啲 2021 年嘅歌落去,就係咁開始呢個 「2021香港製造」 project!

© Goo | Lomography Color Negative ISO 800 film

而用 DJ set 呈現都有另一個主要原因,就係試吓另一種方法去聽本地嘅歌。除咗串流、電台、YouTube、live concert 之外,呢家電子音樂世界好流行嘅 DJ set 又得唔得呢?其實唔係啲咩新嘢,阿媽落 disco 年代啲 DJ 都會打 80 年代啲廣東歌,玩得開心又有親切感。可能都關我無經歷過事,因為到我去 club 嘅年代都差唔多全部係外國歌,所以你可以當係我想整出嚟畀自己體驗吓咁。

當初都諗咗好耐點定義呢個 set 嘅歌,真係屬於 EDM 嘅又唔係好多,同時有一堆懷舊 City Pop 嘅出現又好啱玩,最後就決定大包圍用「2021香港製造」做主旨。揀咗出嚟嘅歌應該有六、七十首?後尾考慮到條片最後嘅總長度同技術上做唔做到,就cut剩呢 49 首。

2021 香港製造 DJ set |波盛 x Wave Channel|Canto Pop, City Pop, HK EDM

本身諗住搵個 LED wall 整啲 visual 加我自己喺度打碟就算,但要顧多樣我唔識嘅嘢就好高難度。後尾諗到不如用天台拍,YouTube 好多 DJ set 都用唔同戶外景。之後就搵咗 Wave Channel 浪頻道嘅 Benson 傾,佢聽完成個 DJ set 嘅 demo 後有呢家 video 見到嘅諗法,仲提議不如邀請埋部份啲歌有份嘅 artist 嚟啦,好似一個 tribute 咁。所以畫面嗰部份全靠Benson 同佢嘅團隊包括賓尼、Tung 同 Ray 去操刀先有咁靚嘅成品。

廣東歌對你來說最大吸引力的,除了是母語,還有什麼原因?

在打碟 DJ 這身份上,你最大目標是什麼?

都好多喎。梗係想喺電子音樂節打碟啦,全場咁多人聽住一首歌然後情緒互相 connect 嗰種感覺好神奇。另外因為做電台嘅關係,曾經幻想過頒獎禮如果可以有 after party 然後打住現場歌手嘅歌,大家唔理有無獎總之飲住酒一齊 party 就最開心。音樂呀嘛,要「樂」至得㗎。最後一樣係可以打自己做嘅歌。

不過,以上三樣我知都唔會成真 sosad , 因為難度太高。如果合乎現實嘅,會想有機會喺唔同場地場合打,例如 club、酒吧、婚禮、不同 event 等等啦。平時喺房自己一個人玩得自己high, 都想有觀眾喺面前互相 connect。希望本地嘅電子音樂可以再蓬勃啲,咁我就多啲歌可以打喇,又可以同啲音樂人合作吓玩吓咁囉,講到尾最緊要開心,因為配合埋畫面、燈光(同酒精)嘅 live DJ set可以好好玩,就好似將你帶咗去另一個空間咁。

而香港其實已經有好多電子音樂製作人,有啲都會打埋碟,今次我都揀咗一啲我自己鍾意嘅放咗喺呢個 DJ set 裏面,例如有 XTIE、Farrah、Jaxis 等等嘅歌。甚至有啲 artist 已經喺國際音樂廠牌出歌、喺國際大型電子音樂節演出,例如 YAKO、Cyrus Gold 等等。我都相信其香港仲有更多嘅電子音樂製作人存在,只係我未接觸到。老土講句,個世界真係好大,無可能識得晒聽得晒,都係一路玩一路學。

© Goo | Lomography Color Negative ISO 800 film

電台 DJ 與打碟 DJ,你怎樣看待自己的雙修 DJ 之路?

我諗起以前同人講我係 DJ, 特別係同外國人講,佢哋第一時間會好興奮問係咪打碟嗰啲。當我答係電台嗰啲,然後就無然後了。所以有少少唔忿氣,心諗如果我係雙修 DJ 你就吹我唔漲啦!

而我公司有位前輩叫 Brian 梁兆輝,佢正正就係雙修 DJ。佢以前有個節目叫〈輝遊記〉已經播緊DJ set, 呢家就喺 mixcloud 度聽到。我都有參考佢嘅節目,究竟喺電台如何 execute DJ set 呢件事?始終無畫面無 lighting 無煙花無噴火,齋聲係唔夠。

去返問題,我唔覺得兩個 DJ 身份係分裂,因為我覺得我打碟叫上手快,慶幸喺電台做 music show 訓練咗啲 sense 同 knowledge。而兩者的確有各自較著重嘅 flow。電台 music show 音樂要去到舒服暢順係基本,但著重點用說話 tag 歌,將兩首歌連埋一齊,好多時會睇重歌詞;打碟 DJ 嘅 set, 我覺得較著重旋律,點樣牽動聽嘅人嘅情緒,帶佢哋進入 DJ 個世界,係感覺多過言語。

我覺得呢家企咗喺中間都幾得意,每度攞少少嚟用。好似今次 2021香港製造 DJ set, 音樂嘅 flow 你會聽到好似一個個章節。先由一首〈一人搖擺派對〉去展開呢個 DJ set, 然後講懷愐昨日美好嘅〈UNCLE〉帶去 city pop 嘅章節,因為 2021 年係有唔少呢類作品。之後用〈CityPop〉呢首歌返翻現實,原因係呢首歌推出嘅時候引起咗熱烈討論,大家會講咩叫 city pop, 呢首歌嘅存在就好似將過去與現在 connect 咗,再加上本身首歌嘅創作係想將懷舊同 modern 嘅元素結合,所以用佢嚟喺個 DJ set 度帶返嚟現實呢刻都好啱數。

咁現實係點?係唔好,同時都思考自己係乜嘢,出路係點。所以會有幾首呼應現況嘅電子流行曲〈呼吸自由〉、〈石山派〉、〈乖乖〉等等出現。之後慢慢越走越 dark, 去到一連串暗黑或者重低音嘅歌(呢 part 我私心最鍾意,因為係我聽開嘅 bass 嘢)。去到結尾會走返去電子流行曲,一啲大家喺 2021 年接觸得較多嘅歌,但用我嘅方法 mix 埋佢哋。

我特別想提最後兩首歌,尾二嗰首〈試驗〉係想代表呢個 DJ set 就係一個試驗,而最後一首嘅〈W2HK〉我一早諗咗用佢嚟埋尾,代表呢一個鐘頭你所聽到嘅嘢都係嚟自香港。我諗成個 DJ set 大致可以咁去解構,而呢種 design 就係作為雙修 DJ 可以做嘅事,亦係我覺得兩者唔分裂嘅原因。

© Goo | Lomography Color Negative ISO 800 film

感謝 Goo 拍攝的菲林照片,以及雙修 DJ 波盛的用心分享。在香港成為一名獨立音樂人是一件非常不容易的事情,所有的堅持源於對音樂的一腔熱誠。這場全是「香港製造」的 DJ set 音樂聚會非常精彩,大家一定要 follow 波盛 ,繼續留意他在香港電台第二台的 《騷動音樂》 節目,還有悉心準備的 DJ set!

以上文字專訪由 Goo 與 DJ 波盛進行,再交由 Lomography HK 整理。

延伸閱讀

【Petzval 80.5 鏡頭】翻開斜槓音樂宣傳人 Goo 的 #野菌工作記事本,細說「打雜」日常的瑣事
【Lomo'Instant Wide】903 DJ Colin《明日之廣東歌》展覽 —— 刻下香港樂壇的歷史年輪

written by christy226 on 2022-04-21 in #culture #people #videos

Lomography Color Negative 800 ISO 35mm

400 度的底片已經無法滿足你了嗎?Lomography Color Negative 800 35mm 讓你在低光源的環境下,仍可拍出美妙的結果。

更多有趣的文章