香港地鐵有限公司 (Project MTR)

每日都坐港鐵返工放工，返學放學，出街回家的你地，又有冇諗過原來港鐵都可以成為一個拍攝好景點呢?

相信每一個香港人對港鐵都唔會陌生。自從在二零零七年十二月二日兩鐵合併後，香港就再無分地下鐵路 (MTR) 同九廣鐵路 (KCR) 而統一為港鐵！由於港鐵的覆蓋可以說是遍佈全港九新界，一般升斗市民都會以港鐵為返工放工，返學放學，出街回家的最佳交通工具。

但係每日都坐港鐵返工放工，返學放學，出街回家的你地，又有冇諗過原來港鐵都可以成為一個拍攝好景點呢?

我同大家都一樣，會經常搭港鐵周圍去。就好似去我之前介紹的迪欣湖，我都係坐港鐵的迪士尼線再行去。而就在坐坐下港鐵的期間，忽發奇想，點解唔攪一個「 Project MTR 」呢？

好多港鐵站其實都會以唔同的顏色做站內主色，隻隻顏色都十分鮮艷。紅、橙、黃、綠、青、藍、紫，真係咩色都有！而七彩斑爛的底色再配上白色（或黑色）的地鐵站名，十分具有特色！如再仔細留意一下，有一些港鐵站的顏色是很特別的，例如彩虹站的彩虹（但係其實只得六隻顏色，至於無左邊隻色？就留待大家自己去發掘啦！）和鑽石山站的閃閃鑽石。而我就特別喜愛油麻地站的杏啡色底配上深藍色字。點解？因為就是喜歡這色配！

個人的第一個構思係 Project MTR 一定要用 E to C 去執行。因為七彩的顏色再加上 E to C 那種 high contrast ， high saturation 的效果，得出嚟的色彩相信可以用「 Marvellous 」來形容吧。

而拍攝的過程呢，站站落車快速拍攝亦可以帶來不少的樂趣！如果你想分秒必爭咁去完成整個 Project MTR ，咁每次落車時記住動作要乾淨俐落呀！哈。如果唔係你就會為咗一個站就要在月台等下一班車咯！而如果站站等的話，就會用去好多好多的時間！我自己影（港島線）的時候，因為金鐘站的人數太多，唯有在月台等人潮散去先可以影到啦。

大家仲要有個心理準備你咁樣玩，其他同車的乘客可能會對你投以奇異的目光，可能會令你有少少尷尬。當時我的決定係：唔單止個個站落車，仲每次都走去唔同的車卡，咁咪唔會有乘客見到你不停地出出入入啦。（畢竟攪藝術係未必被人理解！）

今次先放上部份的照片，遲啲當我完成晒其他的港鐵線時再為大家送上照片！

後記：

Project MTR 尚未完成，每每去到未有照片的港鐵站都會下車拍一拍。希望可以順其自然的情況下完成吧！
其實大家只要多多留意平日經常出現在你身邊的一事一物，咁就可以搵到唔少得意的題材，仲可以為平淡的生活帶來新體驗！

有關交通：

港鐵的東鐵綫、觀塘綫、荃灣綫、港島綫、東涌綫、將軍澳綫、西鐵綫、馬鞍山綫同埋迪士尼綫總共九條路綫內的 84 個港鐵站。建議大家認真計劃路線，盡可能從每條線的總站作起點。

溫馨提示：根據港鐵車票發出條件，乘車超過限定時間（並須在入閘後 150 分鐘內）會有附加費。大家享受攝影樂之餘，也要小心被罰啊！

written by victat on 2010-08-02 in #places #hong-kong #location #back-alley #hk #lc-a #e-to-c #mtr #personal-story #fuji-provia-100-expired