本地菲林攝影愛好者－100 毛主持東方昇眼中的荒謬世界

100 毛的主持東方昇經常拍攝有關不同本地議題的影片，以輕鬆搞笑的方式引起大眾的關注。除了在幕前表演，私下的他亦非常喜歡以菲林相機拍攝，而其中最常用的就是 LC-Wide 與 Diana F+ 相機。在日系風格盛行的年代，他仍喜歡色彩濃郁的菲林照片，想了解他對菲林攝影的想法嗎？立即閱讀我們與他的訪談！

Instagram : wong_kar_wai
Facebook : 東方昇
Lomohome : @wongkarwai

（三思後，編輯決定原文收錄東方昇的答案，口語更為傳神）

1. 攝影對你的意義是？怎樣的題材令你按下快門？

攝影對我嚟講係我嘅第三者。

由於我嘅正印，即係正職，係喺 100 毛做創作，所以平日嘅創作多數係要「媾」觀眾，亦即係大家講嘅「呃 Like」，所以當中需要好多精心設計。而攝影就係我工餘時間嘅興趣，唔需要太多考慮，想影乜就影乜，當下覺得興奮就會㩒快門，所以我非常享受攝影嘅過程。

2. 看見你在 Instagram 也有上傳菲林照片並標籤了 ＃係菲林相唔是數碼呀，比起數碼，菲林攝影更吸引你的地方是？

由於影菲林相充滿住錯誤，所以充滿住驚喜。

影碼相可以即時睇相知道結果，雖然好方便咁紀錄眼前嘅畫面，但就好悶，毫無驚喜可言。而影菲林相充滿住未知同錯誤，所以每一張相都有住無限可能性。

3. 在大家都追棒日系色調與風格時，你以色彩濃郁的 LC-Wide 與 Diana F+ 拍攝，為什麼當初會入手這兩部 Lomography 相機？

我覺得一個人中意乜嘢色調嘅相，其實某程度上反映咗佢嘅心理狀況。我懷疑自己份人比較燥狂，所以不自覺咁偏向中意色彩濃郁嘅色調。

4. 有常用的菲林分享嗎？

Fujifilm Fujicolor Superia X-TRA 400

因為影出嚟嘅顏色比較鮮豔同濃，但好似已經停產咗。

5. 對於菲林攝影，有沒有什麼小心得可與大家分享？

唔好慳住 d 啲菲林，盡情 9 影。

6. 目前你最滿意的菲林作品是？為什麼？

飲醉咗影嘅相。因為影相時嘅狀況係處於理性同非理性之間。

7. 關於幽默感，你說過私下的自己其實是個很低調、沈靜的人，那東方昇的搞笑、幽默感是怎樣磨練出來的？

我覺得東方昇其實係我心入面另一個自己，而當我代入東方昇嘅角色，對我嚟講就好似嘗試用返一個智商得 10 歳嘅小朋友嘅角度去睇世界，並且用一個大膽同 on9 嘅方法回應呢個咁荒謬嘅現實世界。

8. 如果要你以香港社會為題，以攝影為媒界開展一個計劃，將會是什麼呢？

或者我會以抓拍方式影下 D 大陸人喺香港嘅「美態」。

編輯後記：第一次在 LomoHome 發現東方昇的照片，看見上載者名為 @wongkarwai，當下以為他想化稱為導演王家衛，但後來發現他真名是叫王嘉偉。（以他的搞鬼性格，這樣想是不是很合理嗎？）

written by phyllistc on 2018-05-18 in #people #hkreview